雅虎香港電視

【Now財經台】Facebook母公司Meta再遭創辦人朱克伯格減持，係2021年11月以來首次，朱克伯格上月沽出68.2萬股Meta，套現近1.85億美元。另一方面，英偉達(Nvidia)高層亦部署沽貨套現。睇返Meta及Nvidia股價，今年已累積以倍數計升幅，朱克伯格及Nvidia高層趁高減持，係咪股價見頂先兆？

高富金融集團投資總監梁偉民認為，管理層一定係最清楚公司嘅情況，增長仲有幾多，股價係咪已超過合理水平，有呢啲資訊在手一定較易做決定，不過，今次就毌須過分解讀，因為不論朱克伯格或Nvidia高層減持只係涉及逾億美元，對1間市值1萬億美元嘅上市公司嚟講，減持數目微不足道，唔覺得係1個好明顯嘅訊號。

Wyman又話，睇返美股嘅上市公司，減持情況唔係特別明顯，不過，短期嚟講，美股已經好接近高位，甚至需要整固，不論有冇Meta及Nvidia減持消息，現階段都唔適宜高追美股。